سقف سقف
خف تعيش
سقف يمكن يطلعلك ريش
فتطير وتسافر
وتروح متجيش
ونقولك فاكر
وتطنش
وتقول آسف متآخذنيش
سقف سقف
تعرف تستظرف ؟
آه لو تعرف
كنت اديلك أكبر دور ف المسرح
وأغنيلك
وتغنى انت ع الناس
والناس حواليك ..
سكرانه بتطوح
ونجيبك ف البرنامج
برنامج على واحده ونص
حتى آدان الفجر
هنقصه النص
علشان الناس متملش
سقف أمال ميهمش
بلا بن لادن .. بلا أمريكا
انت وبس يا مزيكا..
سقف
غنى
خلى الناس تطوح
أوعى تسيبنى
هتسيبنى لمين وتروح
وأعمل ايه من غيرك
ونبوظ جيل ورا جيل إزاى
بطل دعك ف عينك
هتنام
هعملك شاى
والا أجيبلك بانجو
لأ
عمو المفتى قال مش كله
البانجو نصيب متفدر
سيبك
عمو المفتى لما احكيلك..
راجل زى السكر
ماشى بيفتى
يوم ورا يوم الدين عمال يتطور
أمّال
د كمان بيسلم ع النسوان
كلثومى وعاشق للألحان
وكمان ..
بس اسكت خــــــــالص
آآآه يا نفوخى
يااللى اتبعتر
هو سعاتك مش واخد باللى
واحد؟
والا اكتر
الشاى ده مفهوش سكر
آه يضلالى
شااااى
من غير سكر
طب كنت تجيبه بالسكر والا حليب
شايك حلو
بس غريب
حسسنى ان مفيش حاجه اسمها عيب
أضحك
شفت
شبه التعلب
كشر تقلب ديب
شايك صدقنى غريب
مش عايز أقولك
بيزغزغنى
يعنى
لتفكر نفسك شريب
شايك صدقنى غريب
فرحــــان
أول مره ف حيـــاتى
أبقى حزين
وافرح
مش انت يا عمو مراتى
طوحنى يا راجل
طوح
طوح
متسبنيش المرادى
هتسيبنى لمين وتروح
وأعمل إيه من غيرك
بينى وبينك
شايك ماسخ
بس هجيلك
إتعودنا على فنجان الشاى من إيدك
توهـــــــــــــــــــــان
الفنجان توهان
إتكلم
لا انت شايفنا
والا احنا كمان سامعينك
سيبك
إذا كان بيسلم ع النسوان
سيبك
إذا كان..
أنا والا هلطم
والا أشق هدومى
وإن طلع البيه رقـــــاصه
مش كلثومى
انا والا هلطم
والا أشق هدومى
أيوه هسيبهم
أهى حاجه تستر عورتى
ياااااااااااااااالهوتى
تعرفش فين سكتى
طب جنسيتى
طب سقف كده
طب شوف سقفتى
ــــــــــــــــــــــــــــــــــــــــــــــــــــــــــــــــــــ
موضوع: بيننا سكرانين سقف سقف 
الثلاثاء سبتمبر 04, 2007 9:09 am
